Државниот совет за превенција на детско престапништво го поздравува отворањето на новиот објект на ВПД во близината на с. Волковија и ги поддржува сите напори на директорот на Управата за извршување санкции, г-дин Јовица Стојановиќ да се изнајде соодветно решение за ВПД со цел да се спречи постојано преместување на децата во различни пенитенцијарни установи во државата.
Сепак, Државниот совет е на став дека не смее да се брза со префрлање на штитениците во новиот објект во Волковија поради фактот што не се исполнети потребните услови и префрлањето е поголем ризик за децата, одошто нивна заштита и згрижување.
Во оваа смисла, Државниот совет во целост се согласува со Мислењето на Народниот правобранител, како и ставот на Директорот на ВПД Тетово, г-дин Зоран Стојановски, којшто укажува на потребата од исполнување на неопходните услови пред префрлање на штитениците од Домот и јасно изразува несогласување со настојувањето во истиот објект да бидат префрлени и штитениците од ВПД и децата кои издржуваат казна затвор во Затворот Охрид.
Државниот совет смета дека пред префларање на штитениците од ВПД неопходно е да се обезбедат соодветни кадровски, материјални и логистички услови, инфраструктурни предуслови, но и обезбедување образование и здравствена заштита за штитениците како главни предуслови по коишто треба да се размислува за префрлање на штитениците.
